قصيدة بعنوان
(لو كل كلام???$$##)
لو كل كلام الدنيا إتقال
حكايات وقصص وشعر
عن غربة موت كل مافيها
بس سكوت.....
ووجع وهم مايكفيش.
بيعدي عليك يومك في برد
ورعد ونوم في الليل
ورعشة قلبك
وجدران وصمت كئيب
ما بيدفيش.
بتنام ياحزين على صوت
الويل ومنازعة صدرك
وآهات وصوت خفافيش.
خايف لتقوم فا تعيد الكره.
وترجع تاني تموت في نهار
كله ضباب وزعابيب ورياح
في عز النار وجمر
سحابه تجر سحابه.
ويوم طويل بطول الدهر
ساعاته بطيئه ما بتعديش.
تتلقفت ببطاطين قديمه
عدى عليها الزمن شرب وأكل
وقلبك نازل هبد جواك
وخزانة المونة بتاعتك.
مفهاش حتى كسرة عيش.
فاكرين الغربه ألماظ ولؤلؤ
وشوال فلوس بنعبي جواهر
ملعونة حياتنا بدون حضن
يدفي عضامك ملعونة حياتنا
ال مفيهاش إيد تطبطب تمسح
دمعك وإنت بكتيرك خالص
بتعدي اليوم ماسك ورقه وقلم
بتحاول تفضفض وتكتب يادوب.
كلام على الفاضي وحبة خرابيش.
والسنه تعدي عليك تعاتير
وأكتر ماشيك حافي على كوم
مسامير بتحاول تعدل نفسك
وتصلب طولك خايف تنهار
قدام ولادك ومراتك ال شايله
هموم بالكوم لتبان صغير في
عينيهم مكسور قليل الحيله
ليقولوا لك هات وتقول والله
مافيش........
جواك حزن في لمعان عيونك
وتداري دموعك بضحكه خيبانه
قدامهم وتراضي وتعمل قوي
وضعفك باين وواضح
معزول عن الدنيا ووحداني هيش..........
فاكرين الغربه حمام أبيض
بيرفرف سلام ونعومه
وأرض خضار.
أه لو حسيتوا التنهيده
ال بتشرخ
شرخ في الصدر
وبتجز الروح
من جو الجسد وحاجات
مدفونه مقبوره وسنين بتعدي
وراها سنين بأجسام
منحوله من الريش......
خلوني أكتب عن غربة
موت وسيبوني أفضفض
يمكن ألاقي لي مين يسمعني
يقول لي كفايه يقول لي
كفايه وجعت قلوبنا
ناس تحس وناس بتشعر
وقلوب رحيمه وخوفي
والله وأقسم بمن أحل القسم
لا رجوعي في نهاية
الرحله جوا في صندوق
وجسد منزوع الروح
ومستنيني القبر وفاتح دراعنه
لشهيد الغربه وقراءة فاتحه
وسوره صغيره وعزاء قاصر
على باب جبانتي وكام شيخ
وكام درويش.....
10/1/2026
$$$بقلمي أنا /شاعر العاميه$
(خيرى حسنى)